வைரமுத்து.வலை

கவிப்பேரரசை வாசிக்கவும் நேசிக்கவும்...

  • Increase font size
  • Default font size
  • Decrease font size

 

ஒருவன் ஒருவன் முதலாளி பாடல் பிறந்த விதம்

 

ரஜினிக்கு பாட்டு எழுதும்போது மட்டும் யாரும் சொல்லாமலே தானாக வந்து விழுகின்றன வார்த்தைகள். அதுதான் அவருக்குள்ள வசீகரம், சிறப்பு என்கிறார் கவிஞர் வைரமுத்து.

சென்னையில் லஷ்மன் ஸ்ருதியின் வித்தியாசமான இசை நிகழ்ச்சி ஒன்று ஞாயிற்றுக்கிழமை நடந்தது. இதில் பங்கேற்ற கவிஞர் வைரமுத்து, பல சூப்பர் ஹிட் பாடல்களை எழுதியபோது தனக்கு ஏற்பட்ட அனுபவங்கள், அந்தப் பாடல் பிறந்த விதம் போன்ற சுவாரஸ்யமான பல நிகழ்வுகளை ரசிகர்களுடன் பகிர்ந்து கொண்டார். அவற்றில் சிலவற்றை எஸ்.பி.பாலசுப்பிரமணியம், சித்ரா ஆகியோர் பாடி பரவசப்படுத்தினார்கள். ஒவ்வொரு பாடலையும் அவர்கள் பாடுவதற்கு முன்பாக, அந்த பாடல்களை எழுதிய சூழ்நிலையை கவிஞர் வைரமுத்து விவரிக்க, அதுவே ஒரு தனி அனுபவமாக அமைந்தது ரசிகர்களுக்கு. சூப்பர் ஸ்டார் ரஜினியின் முத்து படத்தில் இடம்பெற்ற ஒருவன் ஒருவன் முதலாளி பாடல் பிறந்த விதம் பற்றி அவர் விளக்கியபோது, அரங்கம் கைத்தட்டலில் அதிர்ந்தது.

அவர் பேசியதிலிருந்து...

ரஜினி அவர்கள் நடித்த முத்து படத்துக்கு பாடல் எழுதுவதற்காக ரஜினிகாந்த், நான், கே.எஸ்.ரவிக்குமார், ஏ.ஆர்.ரகுமான் ஆகியோர் கேரளாவில் உள்ள கொச்சிக்கு சென்றிருந்தோம். அப்போது, ஏ.ஆர்.ரகுமான் ஒரு தனி அறைக்கு சென்றுவிட்டார். நான் பாடலுக்கு மெட்டு போடும் வரை என்னை யாரும் தொந்தரவு செய்யக் கூடாது என்று கூறி அறைக் கதவையும் அடைத்துக் கொண்டார்.

ரஜினிகாந்தும், நானும் ஆன்மீகம், அரசியல் என்று எவ்வளவோ பேசினோம். அப்போது, மாவீரன் அலெக்சாண்டர் பற்றி ஒரு சம்பவத்தைச் சொன்னார் ரஜினி அவர்கள். உலகில் உள்ள அனைத்து நாடுகள் மீதும் போரிட்டு வென்ற அலெக்சாண்டரே, தான் இறக்கும்போது தனது இரண்டு கைகளையும் வெளியே தெரியும்படி வைத்து, இவன் போகும்போது ஒன்றையும் கொண்டு போகவில்லை என்பதை மக்கள் தெரிந்துகொள்ள வேண்டும் என்று தனது உதவியாளரிடம் கூறினாராம். இதை நண்பர் ரஜினி அவர்கள் சொன்னபோது, கேட்டு வைத்துக் கொண்டேன். அதை வைத்தே, ‘முத்து’ படத்தில் வரும் ‘ஒருவன் ஒருவன் முதலாளி...’ பாடலை எழுதினேன். அந்த பாடலின் இடையே ‘மண்ணின் மீது மனிதனுக்காசை, மனிதன் மீது மண்ணுக்காசை..’ என்று எழுதியது இந்த வரலாற்றுச் சம்பவத்தைக் குறிப்பிடத்தான். ரஜினிகாந்தின் சிறப்பே, யாரையும் அவர் நேரடியாக கட்டுப்படுத்துவதில்லை. நம்மையும் அறியாமல் அவர் சொல்வதைக் கேட்போம். அவரது வார்த்தக்கு அப்படி ஒரு வசீகரம் இருக்கிறது. எனக்கு இப்படித்தான் பாட்டு வேணும், இந்த மாதிரிதான் வரிகள் அமையணும் என்று அவர் யாருக்கும் கட்டளை போட்டதில்லை. அவருக்கு எழுதும்போது தானாகவே வந்து விழுகின்றன அத்தகைய வரிகள். அதுதான் அந்த உச்ச நட்சத்திரத்தின் சிறப்பு, என்றார் வைரமுத்து.

 

 


செய்திக் கீற்று

 

வெற்றித் தமிழர் பேரவை

 

உலகத் தமிழர்களை ஒருங்கிணைக்க வெற்றித் தமிழர் பேரவை என்னும் அமைப்பை கவியரசு வைரமுத்துதொடங்கியுள்ளார்.

சமீபத்தில் தனது 49வது பிறந்த நாளில் அடி எடுத்து வைத்தார் கவியரசு வைரமுத்து. இதையடுத்து சென்னைகடற்கரையில் உள்ள அண்ணா சமாதிக்கு சென்று மலர் வளையம் வைத்து அஞ்சலி செலுத்தினார். திமுக தலைவர்கருணாநிதியைச் சந்தித்து வாழ்த்துப் பெற்றார். பின்னர் கடற்கரையில் உள்ள கம்பன், திருவள்ளுவர், பாரதியார், இளங்கோவடிகள், பாரதிதாசன், ஒளவையார்,வீரமாமுனிவர், கண்ணதாசன் ஆகியோரின் சிலைகளுக்கு மாலையணிவித்தார்.

வைரமுத்துவின் பிறந்த நாளை கவிஞர்கள் திருநாளாக கவியரசு வைரமுத்து சமூக இலக்கியப் பேரவைஆண்டுதோறும் கொண்டாடி வருகிறது. இந்த ஆண்டும் இவ்விழா நடந்தது. கவிஞர் இந்திரன், கவிஞர் பத்மாவதி தாயுமானவன் ஆகியோருக்கு இந்தவிழாவில் பண முடிப்பும் பாராட்டுப் பத்திரமும் வழங்கப்பட்டது.

பின்னர் வைரமுத்து பேசியதாவது:

இதுவரை கவிஞர் வைரமுத்து சமூக இலக்கியப் பேரைவை செயல்பட்டு வந்தது. நான வாழும் காலத்தில் எனபெயரோடு எந்த ஒரு அமைப்பும் இருப்பதை நான் விரும்பவில்லை. எனவே, இன்று முதல் இந்தப் பேரவை வெற்றித் தமிழர் பேரவை என்று மாற்றப்படுகிறது. உலகத் தமிழர்களை ஒருங்கிணைத்தல், உலகத் தமிழர்களின் உயிர், உடமை, மானம் காக்க குரல் கொடுத்தல்,உலகத் தமிழர்களின் தகுதியை மேம்படுத்த தன்முனைப்பும் தன்னம்பிக்கையும் ஊட்டுதல், தகுதி மிக்கவர்களின்வேலைவாய்ப்புக்கு உதவுதல் போன்றவற்றில் இப்பேரவை கவனம் செலுத்தும். தமிழனின் உயர்ந்த படைப்புகளை இந்தியாவின் பிற மொழியாளர்களுக்கும், உலக மொழியாளர்களுக்கும் மொழிபெயர்த்து அறிமுகம் செய்யப்படும்.

பழங்காலத்தில் தமிழன் உயர்ந்து நின்றான். கங்கையைத் தாண்டி இமயமலை வரை சென்று வெற்றிக் கொடிநாட்டினார்கள் ராஜேந்திர சோழனும், ராஜராஜ சோழனும். இனறும் நம் தமிழர்கள் உலகம் முழுக்க இருக்கிறார்கள். அமரிக்காவில் உள்ள விண்வெளி ஆராய்ச்சி நிலையமானநாஸாவில் 38.4 சதவீதத்தினர் இந்தியர்கள் தான். மைக்ரோசாப்ட் நிறுவனத்தில் 34.4 சதவீதம் பேர் இந்தியர்கள்தான் பணியாற்றுகிறார்கள். இந்தியாவில் படித்து அவர்கள் அமெரிக்காவில் பணியாற்றுகிறார்கள். ஏன் இந்த நிலை?. அங்கு அவர்களுக்குவாய்ப்பும் வசதியும் தரப்படுகிறது. இந்த இந்தியர்களின் ஆற்றலை ஒன்றுசேர்த்தால் இந்தியா மிகச் சீக்கிரமேவல்லரசாகி விடும்.

இவ்வாறு வைரமுத்து கூறினார். விழாவில் இயக்குனர்கள் பாரதிராஜா, சரண், எழில், பாலா, பட அதிபர்கள் தாணு, ஆஸ்கார் மூவிஸ் ரவி, இசைஅமைப்பாளர்கள் பரத்வாஜ், ஹரீஸ் ஜெயராஜ், மலேசிய தமிழ் எழுத்தாளர் சங்கத் தலைவர் ஆதிகுமணன்ஆகியோர் கலந்து கொண்டனர். புதிதாக ஆரம்பிக்கப்பட்டுள்ள பேரவையின் தலைவராக வைரமுத்துவும், பொதுச் செயலாளராக முத்தையாவும்,துணைப் பொதுச் செயலாளராக செழியனும், பொருளாளராக பாஸ்கரும் தேர்ந்தெடுக்கப்பட்டனர்.