வைரமுத்து.வலை

கவிப்பேரரசை வாசிக்கவும் நேசிக்கவும்...

  • Increase font size
  • Default font size
  • Decrease font size

பிரபாகரனின் நிழலைக்கூட தொடஇயலாது

தமிழீழத் தேசியத் தலைவர் பிரபாகரனின் நிழலைத் தொடக்கூட சிங்கள இராணுவத்துக்கு இயலாது என்று கவிஞர் வைரமுத்து தெரிவித்துள்ளார். முல்லைத்தீவு படுகொலையைக் கண்டித்து சென்னையில் பேராசிரியர் சுப.வீரபாண்டியன் தலைமையில் இன்று நடைபெற்ற முழுநாள் உண்ணாநிலைப் போராட்டத்தில் வைரமுத்து ஆற்றிய கண்டன உரை:

ஈழத்தின் செஞ்சோலைப் பிஞ்சுகளின் துயரத்தில் கண்ணீரஞ்சலி செலுத்துவதற்காகவும் சிங்கள வெறித்தனத்துக்கு நம்முடைய கண்டனத்தைத் தெரிவிக்கவும் தமிழர் பேரவை தலைவர் சுப.வீ. இந்த நிகழ்வை ஏற்பாடு செய்திருக்கிறார். இந்தப் படத்தில் உள்ள பிஞ்சுக் கால்களைப் பார்த்தால் இந்தப் படத்தில் சுரைக்காய்களைப் போல் அடுக்கி வைக்கப்பட்டிருக்கும் பிஞ்சுப் பிணங்களைப் பார்த்தால் இவர்கள் போராளிகளுக்காக பயிற்சி பெற்றவர்கள் என்று சொல்லுகிற பொய் உடைகிறது என்பது நாட்டுக்கு விளங்கும். நண்பர்களே! மூன்று வேண்டுகோளோடு இங்கு வந்திருக்கிறேன முதல் வேண்டுகோள்- தமிழ்நாட்டுத் தமிழர்களுக்கு: கும்பகோணத்தில் நடந்தது தமிழ்நாடு சகித்துக் கொள்ள முடியாத துயரம்- பள்ளிப் பிள்ளைகளின் மரணம். அந்தப் பள்ளிப் பிள்ளைகளின் மரணத்துக்கு தமிழ்நாடே எழுந்து நின்று அழுதது. இந்த செஞ்சோலைப் பிஞ்சுகளின் துயரம் அந்த அளவுக்கு வருத்தியிருக்கிறதா? இல்லையா? என்பதை நெஞ்சைத் தொட்டுச் சொல்ல வேண்டியவர்களாக இருக்கிறோம். விபத்துக்கு அழக்கூடிய தமிழன்- கொலைக்கு அழமாட்டாயா? என்று தமிழ்நாட்டு மக்களை நோக்கி கேட்க வேண்டும். இந்த துயரத்தில் நாம் பங்குகொள்ள வேண்டும். கடைசித் தமிழன் உள்ளவரைக்கும் அங்கு அந்தப் போராட்டம் ஓயவேப் போவதில்லை என்று நெஞ்சை நிமிர்த்திச் சொல்லுகிறேன். சிங்கள இராணுவம் நேற்று ஒப்புக் கொண்டிருக்கிறது- போரால் இந்தப் பிரச்சனையை தீர்த்துவிட முடியாது- போர் மீது எங்களுக்கு நம்பிக்கை இல்லை- விடுதலைப் புலிகளை நாங்கள் வெல்ல முடியாது என்று ஒட்டுமொத்தமாக சிங்கள அரசு பதிவு செய்திருக்கிறது. பிரபாகரனின் நிழலைத் தொடக் கூட சிங்கள இராணுவத்துக்கு இயலாது என்பதுதான் உண்மை. சிங்கள அரசுக்கு ஒரு வார்த்தையுத்தம் செய்கிறீர்களே- உங்கள் யுத்தத்தில் உணர்ச்சி இருக்கிறதா? தமிழன் தன் நிலத்தைப் பாதுகாத்துக் கொள்வதற்காக இனத்தைப் பாதுகாத்துக் கொள்வதற்காக தன் உரிமைகளைப் பேணிக் கொள்வதற்காக தன் பூர்வீக நிலத்தின் மீதான உரிமையை நிலைநாட்டிக் கொள்வதற்காக உணர்ச்சியோடு போராடுகிறான். ஒரு முயலை ஒரு சிங்கம் துரத்திச் செல்கிறது. சிங்கத்தின் வேகம் அதிகமா? முயலின் வேகம் அதிகமா? என்ற ஒரு கேள்வி கேட்கப்பட்ட போது சிங்கத்தின் வேகம்தான் அதிகமாக இருக்கும் என்று தப்பான தகவல் தரப்பட்டது. சிங்கம் உணவுக்காக ஓடுகிறது. முயல் உயிரைக் காக்க ஓடுகிறது. முயலின் வேகம்தான் சிங்கத்தின் வேகத்தைவிட அதிகமாக இருக்கும். அதுபோல்தான் சிங்களவர்கள் கூலிக்கு மாரடிக்கிறார்கள் நம் தமிழர்கள் இனமானம் காக்கப் போராடுகிறார்கள். இந்த உணர்ச்சிகள் இருக்கும் வரை அவர்களை வெல்லவே முடியாது. இந்திய அரசுக்கு ஒரு வேண்டுகோள் இந்திய அரசாங்கமே! நாங்கள் இந்திய இறையாண்மைக்கு நாங்கள் என்றும் பங்கம் விளைவிப்பவர்கள் அல்ல. சட்டப்பேரவையில் முதல்வர் கலைஞர் அவர்கள் நிறைவேற்றியிருக்கிற தீர்மானம் ஒன்றே போதும் அவரது நெஞ்சின் வலி என்ன என்று. அவரால் இந்திய இறையாண்மைக்குட்பட்டு என்ன வகையில் தன் வலியை- கருத்தை வெளிப்படுத்த முடியும்- ஆதரவை தெரிவிக்க முடியும் என்பதை அவர் அழகாகப் பதிவு செய்திருக்கிறார்.

இந்திய அரசே!

நீ சிங்கள அரசுக்கு ஆயுதம் வழங்கினால் அங்கு தமிழினம் பூண்டோடு அழிக்கப்பட்டு விடும். தமிழர்களுக்கு அதுவிரோதம். ஒருவேளை இந்திய அரசு ஆயுதம் வழங்காததால் பாகிஸ்தானிடம் சிங்கள அரசு ஆயுதம் வாங்கிக் கொண்டால் அது தமிழனுக்கு மட்டும் ஆபத்து அல்ல இந்தியாவுக்கே அது ஆபத்து என்பதை மறந்துவிடக் கூடாது. சிங்களர்கள் சூழ்ச்சிக்காரர்கள். வங்காள விரிகுடாவில் ஒரு கையை நீட்டி இந்தியாவிடம் உதவி கேட்கிறார்கள். அரபிக் கடலில் ஒரு கையை நீட்டி பாகிஸ்தானிடம் உதவி கேட்கிறார்கள். இந்திய அரசே! தெளிவாக இரு! பாகிஸ்தான் ஆயுதம் உள்ளே போகாமல் தடுத்து விடு- தமிழர்களுக்கு எதிராக சிங்களவர்களுக்கு ஆயுதம் வழங்கும் எண்ணத்தையே நிறுத்திவிடு. இந்த உண்ணாநிலைப் போராட்டத்தால் பிரச்சனைகள் தீரும் என்று போலிக் கனவு காண நாம் தயாராக இல்லை. இது ஒரு அடையாளம். இலங்கைத் தமிழன் அங்கே பாதிக்கப்பட்டால் இங்கேயிருக்கிற தமிழன் சந்தோசத்துடன் விழித்திருக்கிற முடியாது. அவன் மகிழ்ச்சியோடு ஓய்வு கொள்ள முடியாது. அந்த இரத்தம் இங்கே துடிக்கும். அங்கே தசை விழுந்தால் இங்கே இருதயம் துடிக்கும் என்ற உணர்ச்சியை வெளிப்படுத்த இந்த உண்ணாநிலை என்றார் வைரமுத்து.

 


செய்திக் கீற்று

இலக்கியத்தின் நோக்கம் சமூக அக்கறை

இலக்கியத்தின் நோக்கம் கவிதையும்,​​ காதலும் அல்ல.​ இலக்கியத்தின் உண்மையான நோக்கம் மனிதம்,​​ போரற்ற உலகம், பகுத்தறிவு,​​ சமூக அக்கறை என்றார் கவிஞர் வைரமுத்து.

 

திண்டுக்கல்லில் வியாழக்கிழமை நடைபெற்ற இலக்கியக் களம் நிகழ்ச்சியில் கலந்து கொண்டு அவர் பேசியது:

ஊடகங்களில் சரியான தமிழ் உச்சரிப்பு இருந்தால்தான் எதிர்கால இளைய தலைமுறையால் சரியான தமிழ் உச்சரிப்பு இருக்கும்.​ தமிழைத் தாய் மொழியாகக் கொள்ளாத பின்னணிப் பாடகர்களான டி.எம்.​ சௌந்தர்ராஜன்,​​ பி.​ சுசீலா,​​ பி.பி.​ சீனிவாஸ்,​​ ஜேசுதாஸ் போன்றவர்கள் தமிழைக் கற்று,​​ திரையில் தமிழை வாழ வைத்தனர்.

எனவே,​​ ஊடகங்களுக்கு வர நினைப்பவர்கள் தமிழைக் கற்றுக் கொண்டு உள்ளே வர வேண்டும்.​ ஓர் இலக்கியக் கூட்டம் முடிந்த பின்னர் 2 கேள்விகள் மட்டுமே கேட்கப்படும்.​ பேச்சு நன்றாக இருந்ததா,​​ நன்றாக இல்லையா?​ என்பதுதான் அது.​ இனிமேல் அதுபோல் கேட்கக் கூடாது.​ பேசுபவர் சரியாகப் பேசினாரா சரியாகப் பேசவில்லையா என்பதாகக் கேள்வி இருக்க வேண்டும்.

நன்றாக இருந்தது என்றால் அதன் பலன் பேசுபவருக்கு மட்டுமே இருக்கும்.​ பேச்சு சரியாக இருந்தது என்றால்தான் அந்தப் பேச்சின் பயன் மக்களுக்கும் பயனுள்ளதாக இருக்கும்.

 

40 வயதில் நான் பெற்ற அறிவை இருபது வயதில் இந்தக் கால இளைஞர்கள் பெற்றுள்ளனர்.​ 50 வயதில் கிடைத்த அனுபவம் தற்போதைய 30 வயது இளைஞர்களுக்கு உள்ளது.​ பெற்றோர்கள் எந்தப் புற்றில் எந்தப் பாம்போ என இளைஞர்களைப் பார்த்துக் கூறக் கூடாது.​ எந்தப் பூவில் எந்தத் தேனோ என்று நம்ப வேண்டும்.​ எங்களுக்கு இளைய தலைமுறையினர் மீது நம்பிக்கை அதிகம் உள்ளது.

தமிழின் பெருமையை அறிய உலக இலக்கியங்களைப் படிக்க வேண்டும்.​ யாருக்கோ நேர்ந்த அனுபவங்களைப் படிக்கும் போது கண்களில் நீரைக் கொண்டு வருவதுதான் இலக்கியம்.​ எல்லா அனுபவங்களையும் வாழ்வில் ஒட்டுமொத்தமாகப் பெற்றுவிட முடியாது.​ ஆனால்,​​ இலக்கியத்தைப் படித்து இலக்கியவாதியாக இருந்தால் அனைத்து அனுபவங்களும் கிடைத்துவிடும்.

இலக்கியத்தின் நோக்கம் நிகழ்கால மனிதருக்குத் துன்பம் நேரும்போது தோள் கொடுப்பது,​​ பகுத்தறிவு,​​ மனிதம்,​​ அறம்,​​ போரற்ற உலகம்,​​ முன்னேற்றம் இவற்றைச் சொல்வதுதான்.​ பூவையின் மேல் எத்தனை பூ என்று கொடுக்கப்பட்ட வரிக்கு இலக்கியவாதி எழுதிய கவிதை இது.​ விதவையாக இருந்தபோது பூ வைத்துக் கொள்வதற்கும்,​​ பூ போட்ட சேலை அணிவதற்கும் தடை விதித்த உலகம்,​​ அவள் இறந்த பின்னே சடலத்தின் மீது பூ மாலைகளும்,​​ பூப் பல்லக்குகளும் அமைத்தபோது எழுதினான்,​​ பூவையின் மேல் எத்தனை பூ என்று.​ இந்த சமூக அக்கறை தான் இலக்கியம்.

21 ஆம் நூற்றாண்டில் உலகில் 2 வல்லரசுகளே இருக்க முடியும்.​ அவை ஆசியாவில் உள்ள சீனா,​​ இந்தியா.​ சீனாவில் 60 சதவீதம் பேர் முதியவர்கள்.​ இந்தியாவில் 60 சதவீதம் பேர் இளைஞர்கள்.​ எனவே,​​ உலக வல்லரசாக விளங்கப் போவது இந்தியாதான் ​ என புள்ளிவிவரங்கள் தெரிவிக்கின்றன.​ ​ ​ ​ ​ தமிழைத் தாய் மொழியாகக் கொண்டவர்கள் தமிழை முழுமையாக கற்றுக் கொள்ளாமல் வேறு மொழிகளுக்கு முன்னுரிமை தர வேண்டாம் எனக் கேட்டுக் கொண்டார் வைரமுத்து.​ ​ ​ இந் நிகழ்ச்சிக்கு மாவட்ட நிர்வாகம் ஏற்பாடு செய்திருந்தது.

நிகழ்ச்சியில்,​​ மாவட்ட ஆட்சியர் மா.​ வள்ளலார்,​​ திட்ட அலுவலர் க.​ அருண்மணி,​​ பட்டிமன்ற நடுவர் ஐ.​ லியோனி உள்பட பலர் கலந்து கொண்டனர்.